Bengicabanga Nje
kubhaliwe ngoFano Sibisi (NgesiNgisi lapha -
Just a Thought)
Amaxoxo asifundisa ukuthi uma uthi ulindele ukuba nezwi lomzwilili uyokufa
ungasahayanga neyodwa ingoma. 3
December
Abantu bangayithatha impahla yakho kodwa abakwazi ukuthatha isibusiso sakho. 3 December
Ukuthembuza
kwabanesithembu kuyohlala kungubushudushudu bomdonsiswano ngoba umuntu nomuntu
unenhliziyo eyodwa qhwaba. 1 December 2009
Ngesikhathi
sikaNowa abantu babethi uneconsi kodwa kwathi lapho sebeficwe amaconsi abanzi kazamcolo
kwacaca ukuthi yibona abanamaconsi. 29 November
Waze
wahlonipheka, wathandeka umuntu omkhulu uma embethe ukuthobeka. 29 November 2009
Esiphambanweni
uSathane wayethi umjijimeza umjuqa okokugcina uKristu kanti yilapho esezigwaza ngowakhe
umkhonto. 17 November 2009
Likuphi
leli vesi elicashunwa abaphuzayo abathi lithi, "Wophuza uzilinganisele?" 17 November
Kukhona
okujulile ebuqwayizini kunokudayisa umzimba. Ozodayisa umzimba kumelwe aqale ngokudayisa
umphefumulo wakhe. 17 November
Kuyishwa
eliphindiwe uma ukuhlupheka sekumhlubule ubuqotho umuntu. 13 November 2009
Amanga
amlenzemunye, futhi uma esedaluleka amaqiniso nalowo mlenzana owodwa ubaleka uzephule
amathambo. 13 November 2009
Uma sekuthi
asizinwebe phambi kwabantu asosheshe sizikhumbuze ukuthi ukuzinweba kwaqhumisa ixoxo. 8 November
Uma amehlo uhlale
uwathe njo ezibusisweni zabanye abantu uyophuthelwa isandla esilethe ezakho izibusiso. 8 November
Iqiniso
liyayiqinisa indaba, amanga ayiphendula ibe uwangala, ihaba ligcina seliyenze yaba
yihlaya. 7 November
Uma usasaphaza ifa
awubasweli abazokusaphazisa lona kodwa uma ususezingulubeni abantu bakekelisa okwelanga
lasebusika. 7 November 2009
Abasha banamuhla
abayihhoyi eyokuthi umlilo uyashisa uma bengakazibasi nabo ezabo izandla. 2 November 2009
Umuntu
ohlakaniphile uthola izifundo zamahhala ngokufunda ngamaphutha abanye abantu. 2 November 2009
Uthando olwakhelwe
phezu kwenkohliso lufana nesingcingci sezimuzimu esinembobo enanyekwe ngodaka. 2 November 2009
Indaba ka-Amnoni noTamara ifakazela iqiniso lokuthi
umdlwenguli akadlwenguliswa uthando, udlwenguliswa inkanuko nenzondo. 2 November 2009
Samsoni, uma
uDelila esekhihla isililo ebalisa ngokuthi kanti awumthandi wobaleka uthi galo yephuka. 30 October 2009
Ugombelakwesakhe
akawazi umbuzo othi, "Mhlobo wami, ngingakusiza ngani na?" 30 October 2009
Umuntu
oyishaya emuva ayishaye phambili ngeke ayibone inqubekelaphambili. 30 October 2009
|
