INTERNASIONALE LEWENSKETTING-AKSIE - DURBAN

Duisende mense het die pro-lewe boodskap op Internasionale Lewenskettingdag, 6 Oktober, gehoor. CFT het 'n opelug-program gereël in samewerking met 'n aantal kerke en organisasies. Omtrent 5 duisend pamflette is die dag vantevore versprei om die geleentheid te adverteer.
Die hoofdoel van die Lewensketting-aksie was om mense se aandag op die waarde van die onge-bore kind te vestig. Hoewel aborsie in Suid-Afrika gewettig is, is dit nog steeds moord in God se oë.
Ons het "The Workshop" as vergaderplek gekies omdat dit 'n stampvol plek is wat deur jonk en oud besoek word vir inkopies of om te eet. Meer as 200 pro-lewe ondersteuners het plakkate vertoon met die slagspreuk: "Aborsie maak babas dood", en het die straat en park in stilte omring. Ander het traktaatjies en pamflette uitgedeel met die doel om kontak te maak.
Met die hulp van Radio Khwezi, het CFT 'n "skyn"-radio (bekend as Radio Lewe) opgestel, vanwaar boodskappe en nuusbulletiens uitgesaai is wat mense ingelig het oor die gevaar van aborsie. Sprekers van verskillende kerke het boodskappe van hoop gebring. Advertensies van verskeie organisasies soos 11de Uur Berading, Ware Liefde Wag, Dokters vir Lewe en Siele-Uitreik kon ook op Radio Lewe gehoor word. Pastoor Alvis van Siele-Uitreik het 'n Evangeliese boodskap gebring, en 'n uitnodiging tot oorgawe gemaak. Later het eerwaarde Joyce Adams van Amerika 'n boodskap uit Gods Woord gebring. Daar was 'n bemoedi-gende reaksie.
As geheel gesien, was dit 'n baie suksesvolle veldtog. Ons moet nie moeg word om hierdie boodskap uit te dra nie. As God se kinders is dit ons plig om voortdurend die weg aan te wys. Die volgende pro-lewe aksie waarby CFT betrokke sal wees, is ‘Onskendbare Lewe’-Sondag op 2 Februarie 2003. Ons sal die ongeveer 270 000 Suid-Afrikaanse babas onthou wat geaborteer is sedert die wettiging van aborsie op aanvraag in Suid-Afrika op 1 Februarie 1997.
"Praat, en lewer regverdige uit-sprake, laat reg geskied aan die armes en ellen-diges" (Spreuke 31:9).

WARE LIEFDE WAG - NUUSFLITSE

WARE LIEFDE WAG (WLW) het plakkate oor reinheid voor die huwelik gedruk en uitgestuur na al die hoërskole in KwaZulu-Natal. Dit was ‘n geweldige taak en vrywilligers is gebruik om 'n meegaande brief saam te verpak met die omtrent 1 800 plakkate wat gestuur is. Ons vertrou dat die plakkate die skole sal bereik en opgesit sal word vir Wêreld Vigsdag op 1 Desember.
Ware Liefde Wag beplan ook om 'n WLW-radioadvertensie sowel as ‘n persverklaring gereed te hê vir daardie dag. Gedurende die feesseisoen, is beplanning en vars vooruitsigte vir 2003 op ons program.
'n Verdere hoogtepunt was die WLW-uitreik in Calvinia in die Noord-Kaap waar die boodskap van reinheid versprei is oor die plaaslike radio-stasie, by skole, kerke en selgroepe.

HOF GEE ROOI LIG VIR BORDELE

Die Grondwetlike Hof het prostitusie sowel as die besit van 'n bordeel onwettig verklaar. In 'n naelskraap beslissing het ses van die 11 regters beslis dat seks teen vergoeding nie grondwetlik is nie. Die beslissing het die uitspraak van die Johannesburgse Hooggeregshof verlede jaar, wat die verbod op die ontvangs van geld in ruil vir seks opgehef het, ter syde gestel. Dit het ook die Hoërhof se uitspraak gehandhaaf dat die besit van 'n bordeel ongrondwetlik is. (SABC Nuus, 9 October 2002)
Daar is egter alreeds pogings om druk op die parlement uit te oefen om die wet te verander.

Dokters verbind om verslaafde vroue te help

Dokters vir Lewe Internasionaal (DVL) het hulle blydskap te kenne gegee oor die uitspraak van die Suid-Afrikaanse Grondwetlike Hof wat prostitusie onwettig verklaar. Sedert 1996 toe die saak in die laer howe begin het, was DVL betrokke as staatsgetuie. In die beoordeling van die finale saak voor die Grondwetlike Hof, is uittreksels van DVL se insette aangehaal.
Die getuienis wat DVL in die hof gelewer het, toon duidelik dat prostitusie op sigself vroue verneder, en dat dit aanleiding gee tot gewelddadige misbruik van prostitute deur kliënte sowel as koppelaars.
Verdere getuienis is gelewer dat prostitusie die internasionale handel in vroue bevorder; dit lei tot kinderprostitusie; is 'n hoë risiko vir die verspreiding van seksueel oordraagbare siektes, veral MIV/vigs; dit hou verband met ernstige dwelmmisbruik en dit is 'n openbare steurnis.
DVL het hulle verbind om enigiets in hulle vermoë te doen om voort te gaan en om om te sien na die toestand van vroue wat vasgevang is in die moderne slawerny van prostitusie. Hierdie vroue moet bygestaan word in die ontwikkeling van beroepsvaardighede om sodoende ander beroepe te kan vind. Vir hierdie doel kan die volgende hulplyn geskakel word: 073 224 9221.

PIRAMIDE-SKEMAS EN MULTIVLAK-BEMARKING

(Deur Linda Magqabi, vervolg vanaf November/Desember-uitgawe)

Wat is Multivlak-Bemarking (MVB)?

Multivlak-bemarking staan ook bekend as direkte bemarking of netwerk-bemarking. 'n MVB-Maatskappy is wettig omdat dit 'n manier is om sy produkte te verkoop. Dit is wanneer die klem op die werwing van nuwe verspreiders val dat die MVB-maatskappy in 'n piramide verander. Die struktuur van die organisasie neem dan die vorm van 'n piramide aan. Die probleem van die groeimetode van so 'n struktuur is alreeds uitgewys. Gewoonlik gee niemand in so 'n MVB-struktuur enige aandag aan hierdie feit nie. Die onbeheerde werwing van verspreiders gee aanleiding tot die probleem van oorvoorsiening.
Enige besigheid moet aanvraag en voorsiening deeglik bestudeer. Die bestuur van voorsiening en aanvraag is kritiek in enige besigheid vir enige produk of diens. Met enige produk is daar 'n versadigingspunt, d.i. waar daar 'n oorvoorsiening is van 'n spesifieke soort produk. As die voorsiening van 'n spesifieke produk verhoog, dan verlaag die aanvraag. Daar is 'n ingewikkelde verhouding tussen hierdie faktore en die prys van die produk, soos aangedui deur hierdie grafiek:

Wanneer die aantal verspreiders nie beheer word nie, kan versadiging van die mark maklik bereik word sonder dat iemand dit opmerk, of erger nog sonder dat hulle dit wil opmerk!

Waarskuwing!

Wees baie versigtig wanneer:

• u kits-rykdom belowe word.
• u vertel word "Almal sal hierdie produk wil koop!"
• die produk buitensporig duur is.
• ontevredenheid met u huidige situasie aangeblaas word.
• die persoon deur wie u gewerf word, sekere feite van u weerhou.
• die persoon deur wie u gewerf word, druk op u plaas om onmiddellik aan te sluit.
• die klem geplaas word op die werwing van ander verspreiders.

Slot

Veroorloof my 'n paar slotopmerkings. Die Woord van God sê dat ons wakker en waaksaam moet wees in alle dinge. Dié wat in die bediening staan, moet veral versigtig wees dat niks hulle ywer vir die Evangelie sal uitblus nie. Wees bewus daarvan dat Netwerk-bemarking baie tydrowend is, en 'n persoon maklik van sy geestelike doel kan vervreem. Plaas jou vertroue en hoop in die Here Jesus Christus, en nie in mense en geld nie. Moenie huiwer om hulp in te roep as daar enigiets is wat jy nie verstaan nie, of waaroor jy onseker is. In Zoeloe sê hulle "Indlela ibuzwa kwabaphambili!" wat beteken dat dié wat reeds daar was, gevra word om die pad te verduidelik. Ten slotte, 'n wyse stelling deur 'n Godsman, as stof tot nadenke:
"Die lokaas is nie in die muisval om die muis kos te gee nie, maar om hom te vang."
- Spurgeon.

OORDENKING – WEES GEREED

"Bly dus waaksaam, omdat julle nie weet watter dag julle Here kom nie." Matteus 24:42
Die 24ste hoofstuk van Matteus het 'n menigte Christene se skippies laat sink wat probeer het om datums en voorspellings oor eindtye vas te stel. Verse in die boeke Daniël en Openbaring word gebruik vir berekeninge van hoe God sou werk in die laaste dae. Een beweging gaan so ver om te verklaar dat die "kerkeeu" nou verby is.
Die duidelike boodskap uit Matteus 24 is "om gereed te wees". Ons moet gereed wees vir die terugkoms van die Here, hetsy dit vir Sy wederkoms of as Hy ons neem deur die dood. 'n Waaksame Christen is aktief besig om die Here en sy medemens te dien terwyl hy wag vir Christus se wederkoms (vs 45). Ons Heer gee 'n voorbeeld van die onwaaksame/onbetroubare dienskneg (vs 48-51) wat, instede van ten alle tye gereed te wees, aanneem dat sy heer op weg vertraag is en dan begin om sy medediensknegte te slaan en so word hy 'n werktuig van sonde. Dus sal ongehoorsaamheid aan die bevel van die Here om "gereed te wees", uitloop op skinder en om andere te weerstaan en te beveg. Klink dit bekend?
Mense in die wêreld doen hulle bes om gereed te wees. Onlangs het 'n eksentrieke Fransman nuuswaardig geword: ‘Crazy Eric’ soos hy bekend staan, word nou in die rekords erken vir die buitengewone daad om meer as 1000 bruikbare voorwerpe permanent op sy lyf rond te dra. Hy het die bynaam verwerf as die Switserse Weermagknipmes op twee bene en het dit gemaak tot in die ‘Guiness Book of Records’. "Crazy Eric" is gereed vir enigiets, maar moontlik nie vir die belangrikste nie - vir sy einde of die terugkoms van Jesus.
Wat van u, is u gereed vir die terugkoms van Christus?

EERBEWYSE STROOM IN VIR SA CHRISTELIKE LEIER

Die afsterwe van Dr Ed Cain, redakteur van ‘Signposts’, word deur vriende regoor die wêreld betreur. Dr Cain wat op 13 November in Pretoria begrawe is, het vele navorsingstukke gelewer wat Bybelse demokrasie bepleit en was 'n wêreldleier om die leuen in die bevrydingsteologie bloot te lê. Eerbewyse van Chrstenleiers in Suid-Afrika en oorsee is op die begrafnis gelees.
In sy bydrae het die President van CFT, Fano Sibisi, gesê: "Dr Ed Cain. Ons het hom Ed genoem. Die verse wat my aan hom laat dink was, 'Wie is eintlik die getroue en verstandige slaaf vir wie sy eienaar oor sy ander slawe aangestel het om hulle op tyd kos te gee? Dit is die slaaf vir wie sy eienaar by sy tuiskoms so aan die werk sal kry. Gelukkig is hy' (Matt 24:45-46). Vir jare lank het Ed ons bygestaan met sy spesiale analitiese vermoëns. Sy uitleg van wêreldgebeure en kwessies in die lig van Bybelse beginsels, was vir vele al tot groot hulp.
Behalwe dat ons hom gehoor het op konferensies, kon ons hom soms tuis besoek saam met Deane sy vrou en Miriam sy dogter, om sy insig te hoor oor verskeie sake. Dit was 'n ondervinding om te sien hoe hy, soos 'n ervare snydokter enige onderwerp wat hom gegee word, dissekteer. Al die jare wat ons hom geken het, was hy standvastig, onbeweeglik. So 'n man van God laat 'n leemte agter."