Sept - Okt 2002 Newsletter

Sept - Okt 2002

Indeks:

WARE LIEFDE WAG NEEM DEEL AAN STAPTOG VIR ONTHOUDING IN KWAZULU-NATAL

'n Groep jongmense, voorstanders van seksuele reinheid voor die huwelik, het 'n staptog onderneem as deel van hulle pogings om MIV/vigs-bewustheid te bevorder.

Die onthoudingstaptog "Uitdaging" het op Sondag 9 Junie in Port Shepstone begin, en nadat omtrent 50 km per dag gestap is, het die groep Vrydag, 14 Junie, in Pietermaritzburg aangekom. Die doel van die staptog, wat saamgeval het met Jeugdag, was om die jeug aan te moedig om hulle te onthou van seks voor die huwelik. 'n Skare skoolkinders het langs die sypaadjie versamel om die stappers te verwelkom met hulle aankoms in Durban op Woensdag die 12de Junie.

Tussen die deelnemers was Ishmail Maluleke, die toonaangewende doelskopper vir Manning Rangers in die Premier Sokkerliga van die vorige seisoen. "Dit is 'n baie goeie saak omdat baie jongmense die dodelike siekte opdoen, en dit is ons verantwoordelikheid om te verseker dat ons beskerm is teen MIV/vigs. Die beste ding om te doen, is onthouding," sê Maluleke. Verteenwoordigers van al nege provinsies, insluitende Zweli Mkhize, die provinsiale Gesondheidsminister, sowel as Manto Tshabalala-Msimang, die Minister van Gesondheid, het hulle ondersteuning kom toon en het die inisiatief gesekondeer. (www.truelovewaits.org.za; SABCnews, 9 & 12 Junie)

"ESTER-PROJEK"

"Wie weet, miskien is dit juis met die oog op ’n tyd soos hierdie dat jy koningin geword het." Ester 4:14

Augustus-maand, Vrouemaand, is dié maand in die jaar waarin Christenvroue hulle stem moet laat hoor. Die "Ester-projek" mobiliseer CFT-vroue om die pen of die telefoon op te neem en, om inisiatief te neem met betrekking tot vroue-aangeleenthede.

Ons is almal bekommerd oor die Vigs-krisis in Suid-Afrika. Talle organisasies, op verskeie maniere, wend pogings aan om die epidemie te stuit. Daar is egter sommige Vigsvoorkomingsveldtogte wie se strategieë ‘n dubbele boodskap uitdra, wat hulle doel weerspreek en verwarring bring. U het seker opgemerk dat baie advertensieborde langs die paaie dwarsoor die land die saak aanspreek - ongelukkig is baie daarvan regtig afstootlik. Dikwels word geen melding gemaak van seks binne die konteks van die huwelik, van self-dissipline of morele oorwegings nie. Ook word die risiko van kondoom-mislukkings nie duidelik gestel nie.

En steeds dra Suid-Afrikaanse koerante die groeiende aantal advertensies van gesellin-klubs en seksuele dienste wat te koop aangebied word. Die media verskaf olie op die vuur wat hulle voorgee om te beveg.

Die werklikheid staan nou vierkantig voor ons dat MIV-vigs steeds pandemies versprei ten spyte van al die geld wat reeds vir veldtogte en kondome uitgegee is; dink aan die weeskinders, die lyding van die siekes, die armoede en ellende.

Ons is daarvoor verantwoordelik om te vra vir alternatiewe strategieë in die oorlog teen vigs waar die amptelike strategie van die Departement van Gesondheid beklemtoon word, naamlik: A = "abstinence"/weerhouding en B = "behaviour"/ gedrag (getrouheid in 'n huweliksverhouding), as 'n alternatief tot C = "condoms". Ongelukkig spandeer die Departement net geld op C... Ons moet versoek dat hoër morele standaarde en gesinsvriendelike waardes gepropageer word.

Hier onder is kontaknommers van staatsamptenare, inbelprogramme op radiostasies, koerante en verwante organisasies wat gekontak kan word met versoeke en voorstelle in die stryd teen Vigs. Indien u meer inligting nodig het, skakel gerus CFT se hoofkantoor: (032) 481-5512; mail @cft.org.za . (Ons sal dit baie waardeer indien u ons op hoogte kan hou van enige terugvoer op u aksies en voorstelle, reaksies deur u ontvang, ens.)

Kontaknommers:

1. Departement van Gesondheid:

Direkteur-generaal - Dr A. Ntsaluba

Privaatsak X828, Pretoria, 0001;

Tel: (012) 312-0000; Faks: (012) 325-5706;

E-pos: joanvs@health.gov.za

Direkteur: Kommunikasie - Me Samantha Bloem

Tel (012) 312-0839; Faks: (012) 321-2207;

E-pos: bloems@health.gov.za

2. Radio Inbel-programme verskaf telefoonnommers om regstreeks te bel.

Byvoorbeeld:

* Tim Modise se program op SAFM, elke weeksoggend van 8:30 - 10:00;

Tel: 0891-104-207; e-pos: tyawab@safm.co.za

* RSG:

- Sarel Myburgh (Stasiebestuurder: (011) 714-2702;)

- Robert Young (Programbestuurder: (011) 714-4405)

- Praat met aanbieder elektronies: www.rsg.co.za /ze/se/se_index.html

3. Koerante en tydskrifte se kontaknommers vind mens normaalweg op die eerste bladsy.

Vir meer inligting besoek die webwerf van CFT: www.cft.org.za

"LAAT DIE KINDERTJIES..."

"…kindertjies smeek om brood maar niemand gee vir hulle iets nie." Klaagliedere 4:4

Wie sal die Brood van die lewe vir die kinders van vandag breek? Dit is hartseer dat baie ouers en volwassenes nie tyd neem om kinders te vertel van die Saligmaker nie. Kinders word daarenteen grootgemaak op 'n dieet van allerlei gruwelikhede soos deur die televisie en video’s opgedis. Selfs die onderwysstelsel het geen ware voedsel om aan jong mensies te bied nie.

Terselfdertyd word ons deur die Kinderbeskermingseenheid van die Polisie ingelig dat seksuele mishandeling van kinders dikwels binne die familiekring plaasvind. My onmiddellike vraag is: Hoe kan 'n mens selfs begin om met mense te praat wat nie tyd het om hulle kinders van Christus te vertel nie, en boonop so ver gaan om hulle te molesteer?

Dink net ‘n bietjie aan die slagting van ongebore kindertjies . Selfs welvarende gemeenskappe in die wêreld, met alle luukshede tot hulle beskikking, toon geen erbarming vir kinders nie, inteendeel, daar word gespog met hoërstygende aborsiestatistieke.

Kan u die duiwel se strategie raaksien? Hy haat kinders, en gebruik volwassenes om hulle te vernietig. Vermorsel hulle voordat hulle hul eerste asemteug buite 'n moederskoot kan neem. In gedeeltelike aborsie word party amper gebore, maar doodgemaak by ontvangs.

Dié wat oorleef word gebore in 'n wrede wêreld. Wanneer hulle vra vir dit wat hulle lewe sal gee, kry hulle dit nie. In plaas daarvan word hulle met haat, woede, geweld, seksuele misbruik, ens. gevoed.

Klink dit na 'n te donker prentjie? Ek wens dit was.

Christus het die probleem raakgevat toe kindertjies na Hom toe gekom het; dit was volwassenes wat hulle gekeer het. Daarom sê Hy: "Laat die kindertjies na My toe kom en verhinder hulle nie, want aan sulkes behoort die Koninkryk van die hemele" (Matteus 19:14).

Hy het 'n streng waarskuwing gerig aan dié wat "kleintjies" laat struikel: "Elkeen wat een van hierdie kleintjies wat in My glo, van My afvallig laat word, vir hom is dit baie beter as 'n groot meulsteun aan sy nek vasgemaak en hy in die see gegooi word" (Markus 9:42).

Wat is die antwoord op dit alles?

Christus het dit aan ons gegee op die Via Dolorosa -- die pad van lyding. Terwyl vroue huilend hulle droefheid en jammerte vir Hom betoon het, het Hy die soeklig van Homself weggedraai en op die ware probleem gerig: "Maar Jesus het na hulle toe omgedraai en gesê, 'Vroue van Jerusalem, moenie oor My huil nie, huil oor julleself en julle kinders...'" (Lukas 23:28).

Terug na 'n "selfondersoek en inkeer."

Dis ek, o Heer, wat gebed nodig het…

Vir my.

Vir my vrou.

En dan vir die kinders. (Deur Fano Sibisi)

OORDENKING: OPREGTHEID EN ‘N BIETJIE DWAASHEID

"’n Troebel fontein en ’n vuile bron, so is die regverdige wat wankel voor die goddelose." Spreuke 25:26

In Prediker 10:1 lees ons: "Dooie vlieë laat salf stink en gis, 'n bietjie dwaasheid doen meer kwaad as wat wysheid en eer goed doen."

Dit het 'n aanvaarde norm geword dat 'n bietjie dwaasheid, klein misdrywe, heeltemaal normaal is in die Christlike lewe. Paulus se voorskrif was om die wapenrusting van God aan te trek, insluitende die borswapen van geregtigheid van Christus en wat altyd 'n deel van die daaglikse lewe word (Efesiërs 6).

'n Polisieman wat pas teruggekeer het van 'n gewapende rooftog, het gesien hoedat 'n vragmotor oor 'n stopstraat ry. Hy het die bestuurder beduie om van die pad af te trek, en toe hy die voertuig nader, het die bestuurder hom tromp-op geskiet met dieselfde wapen wat hy 'n kort rukkie tevore gebruik het om 'n winkel wat 24 uur oop is, te beroof. Die gesteelde geld was langs hom op die sitplek. Die polisieman het twee meter verder neergeval. Toe staan die polisie-offisier op, trek sy diensrewolwer uit, en skiet twee skote. Die eerste koeël het deur die oop venster getrek, en die tweede het 'n gat in die deur geruk en in die bestuurder se linkerbeen ingedring. "Moenie skiet nie!" het die dief geskree, terwyl hy die wapen en die sak met geld by die venster uitgegooi het. Wat die lewe van die polisieman gered het, was die baie lae Kevlar, die buitengewoon sterk matriaal wat in koeëlvaste onderhemde gebruik word. Die polisieman het nog steeds sy onderhemp aangehad van die toneel van aanhouding af (soos meegedeel deur Charles Birch).

Trek aan hierdie borswapen van geregtigheid, en dit sal jou teen die aanvalle van die bose beskerm. Wees op jou hoede vir hierdie pyle van die vyand, maar wees selfs meer waaksaam vir jou eie hart en gedagtes. Net een of twee vlieë kan 'n aaklige stank veroorsaak in plaas van die soet geur van Christus.

"SOOS DONKER KWASSTREPE OP DIE SKILDERDOEK VAN DIE LEWE…"

Deur Jose A. Bufill (kankerspesialis in South Bend, Indiana.)

Diane Pretty, 'n gewone Britse vrou en ma van twee, het haar lewe verlede maand op 'n "doodgewone" manier beëindig. Volgens haar dokter, Ryszard Bietzk, was haar dood "volkome normaal, natuurlik en vreedsaam".

Dit kon anders gewees het as haar versoek om ondersteuning om te sterf, dertien dae tevore deur die Europese Hof vir Menseregte toegestaan is. Naby die einde van haar moeilike siekte wat drie jaar geduur het, het Pretty 'n veldtog geloods vir die reg om te sterf, en verloor.

Terwyl ek haar doodsberig, wat wyd in Europa gepubliseer is, gelees het, het ek onthou van my eerste kennismaking met ondersteunde selfmoord - die saak wat nie tot 'n einde wil kom nie.

Kort na die voltooiing van my kliniese opleiding as 'n kankerspesialis, het 'n kollega my gevra om 'n jong man wat MIV-positief was, te ondersoek. Vir 'n hospitaal in New York in 1990, was die geval eenduidig. Die pasiënt, omtrent dieselfde ouderdom as ek, het goed gelyk, sonder die kenmerkende gewigsverlies, wat so tipies is van mense met gevorderde vigs. Hy het reeds 'n paar opgehewe rooi vlekke, die grootte van 'n klein muntstuk, op sy rug en linkerarm gehad, wat kenmerkende letsels van Kaposi's sarcoma is. Ek het na sy geskiedenis uitgevra, hom fisies ondersoek, en begin om sy siekte te bespreek. Gou het hy egter my roetine onderbreek: "Kyk, al wat ek wil doen, is om te sterf. Kan u my help?"

Wat? Jack Kevorkian en sy "selfmoordmasjien" was toe voorbladnuus, en dit het iets na vore gebring waaraan ek persoonlik nog nooit gedink het nie. Miskien is dit daardie stories, wat ek maar redelik onbetrokke en met weersin gelees het, wat my pasiënt daartoe gelei het om 'n einde aan sy lewe te wil maak. Dis nou reeds meer as tien jaar sedert ek die eerste keer met ondersteunde selfmoord kennis gemaak het, maar dit verwar en verlei nog steeds siek mense en hulle dokters.

In staat om 'n produktiewe lewe te lei

Vir die onsensitiewe oog het my pasiënt gesond gelyk. Hy was nie besonder onsteld of beangs nie. Hy het geen pyn gehad nie, en kon nog maklik asemhaal. Hy was besig om te herstel, en kon verwag om weer 'n produktiewe lewe te lei. Tog het hy sy lewe ondraaglik gevind, en wou 'n einde daaraan maak.

Iemand anders sou miskien geneig, of selfs verplig gevoel het om hom te help om sy lewe te beëindig. Wanneer swaarkry, of dit nou geestelik of fisies is, aanhoud en oorweldigend word, mag dit baie menslik lyk om 'n einde aan alles te maak.

Ek kan egter nie help om te voel dat hierdie tipe "genade" nie die regte soort is nie. Om doktersondersteunde selfmoord aan te beveel, is om te ontken dat lyding enige waarde het, en om te sê dat die afwesigheid van enige iets onaangenaams noodsaaklik is vir 'n lewe wat die moeite werd is om te leef.

Elkeen van ons sal op een of ander tyd moet swaarkry. Om dit van jou af te skud of om daarvan weg te hardloop, beteken dat jy jou in 'n skynwêreld terugtrek. Ons moet dit eerder moedig in die gesig staar, en probeer om iets van die doel daarvan te verstaan.

Voeg diepte en perspektief by

Soos donker kwasstrepe op die skilderdoek van die lewe, voeg lyding skoonheid en prag by 'n skildery. Tot die tyd van die Renaissance, was skilderye eentonig en van twee-dimensionele kwaliteit. Daarna, deur die gebruik van die "lig-en-donker"-tegniek (chiaroscuro), het kunstenaars hulle voorwerpe se helderheid en donkerheid op kragtige nuwe maniere uitgebeeld. Hulle werk het onverwagte perspektief en diepte openbaar wat die werklikheid meer akkuraat weerspieël het.

Lyding doen aan die lewe wat chiaroscuro aan 'n skildery doen. Beide help ons om klein, maar belangrike werklikhede te waardeer: waarhede wat maklik misgekyk word, maar wat tog 'n meer presiese en realistiese prentjie van ons wêreld verskaf. Die skadu's van lig of lyding bied ons 'n geleentheid om onsself te sien soos wat ons werklik is: broos, behoeftig, en te dikwels uitgeput deur die dinge wat ons het of doen.

Lyding kan die lewe se diepste betekenis openbaar. 'n Algemene rede waarom ondersteunde selfmoord aangevra word - en onbetwisbaar die oorsaak van die grootste moontlike lyding - is eensaamheid: die onverskilligheid van ander, die gevoel dat jy nie waardeer word nie of ongewens is, of nie bemin word of beminlik is nie. Van sulke lyding leer ons dat mense hulle identiteit en waardigheid leer ken deur onvoorwaardelik lief te hê en onvoorwaardelike liefde terug te ontvang.

Die swak en broses, die oues en kwesbares, die gestremdes en terminaal siekes, kan daardie krag van onvoorwaardelike liefde laat ontluik. Ons kan ons tyd en energie aan ander wy, om geen ander rede nie as dat hulle die moeite werd is.

Die woord "genade" of "meegevoel" kom van die Latynse stamwoord wat beteken "om saam te ly". Ondersteunde selfmoord maak 'n mens dood, maar daar is 'n ander slagoffer: Ons menslikheid -- die moontlikheid om saam met die mees kwesbare lede van ons samelewing te ly -- sterf ook in die proses.

‘UIT DIE MOND VAN SUIGELINGE...’

‘n Klein dogtertjie van vyf jaar oud was teenwoordig by ‘n kerkbyeenkoms waar die tieners die geleentheid gekry het om Ware Liefde Wag-kaartjies te onderteken, om hulleself aan seksuele onthouding voor die huwelik te verbind.

Voordat sy gaan slaap daardie nag, sê sy vir haar ma: "Mamma, ek is so teleurgesteld dat ek nie ook ‘n kaartjie kon onderteken nie". Die ma het geantwoord: "Ja, jy moet twaalf jaar oud wees voordat jy kan teken." Dit het die dogtertjie nie tevrede gestel nie, en sy gaan voort om te sê: "Maar ek wil ook rein wees".

Die wyse moeder het toe voorgestel dat sy op die rekenaar ‘n spesiale kaartjie sal ontwerp vir die dogtertjie om te onderteken.

Die kleinding het gedink dat dit ‘n uitstekende idee was en het bygevoeg "Skryf asseblief daarop dat ek rein sal wees tot die dood toe."

FATALE AANDAG-AFLEIERS

As die duiwel jou nie voor versoeking kan laat swig nie, sal hy hom tot sy gunsteling alternatief wend, naamlik om jou van God se weg vir jou lewe af op 'n syspoor te bring. Dit is natuurlik net so verkeerd soos doelbewuste sonde - net meer subtiel en moeilik om raak te sien. Die gevolge is baie keer erger as ooglopende boosheid omdat die slagoffer baie tyd verkwis en partykeer sy hele lewe vermors met entoesiasme en ywer in 'n verkeerde rigting, in plaas van in God se werk.

Kom ons bespreek 'n paar duidelike voorbeelde, asook 'n paar van die meer subtieles:

Eindelose geslagsregisters - Verkeerde idees veroorsaak verkeerde optrede en so kan verkeerde interpretasie van die Bybel rampspoedige gevolge hê. Neem byvoorbeeld die enkele vers in die Nuwe Testament wat 'n ongelooflike hoeveelheid werk en verkwiste tyd en ewige verlies tot gevolg gehad het. Paulus het die Korintiërs gevra "wat wil die mense bereik wat hulle vir dooies laat doop?" (1 Kor. 15:29). Die Mormone het hierdie vers (wat oor die hoop van die wederopstanding handel) geneem om te impliseer dat doopseremonies namens die gestorwenes uitgevoer moet word, om hulle daardeur te red. Die enigste manier om hulle gedoop te kry, is om dit namens die gestorwene te doen, of hulle dit wil hê of nie. Om gevolmagtigde doopplegtighede te hê, moes 'n mens die name van die gestorwenes hê. Dus: die Mormone het die beste geslagsregisters in die wêreld. Hulle sal tot uiterstes gaan om die name van mense op te soek wat eeue gelede gesterf het. Geweldig baie energie (en miljoene werksure) is in 'n vrugtelose, eintlik belaglike, syspoor ingepomp in plaas daarvan om die Here se weg te volg soos wat dit baie eenvoudig in die Bybel uitgespel word.

Die meerderheid kultusse het op soortgelyke wyse ontwikkel: hulle konsentreer op minder belangrike dinge en volg dan die verkeerde pad vir baie geslagte.

Maar laat ons verder gaan as om kultusse oop te vlek - want hulle is maklik om te verdoem en hulle foute staan in skerp kontras teenoor God se waarheid. Wat van die Christen, die een wat Christus gevind het en vergifnis vir sy sondes ontvang het? Behalwe vir die baie sondige aandag-afleiers, is daar 'n hele reeks ander aandag-afleiers wat hom kan besig hou en nutteloos maak vir die Here se werk. Kom ons kyk na 'n paar:

1. Saak-Christene

Tallose Christene volg hierdie doodloopstraat omdat dit so reg lyk. 'n Kwessie, veral 'n Bybelse saak, kan die gelowige só kwel dat hy min tyd het vir 'n verhouding met God en al sy energie daaraan wy om vir 'n saak te veg. Natuurlik moet ons Christene ons lig laat skyn, en ons moet nooit terugdeins vir die oorloë vir die waarheid wat God voor ons plaas "te midde van ontaarde en korrupte mense nie" (Fil. 2:15). Nietemin, laat ons nie ons Leidsman vergeet nie - die Kaptein van God se leërmag - Christus Self. Hoe aaklig is dit as 'n kind van die Here 'n veldtog voer vir die lewe van die ongeborenes terwyl hy self besig is om geestelik dood te gaan, of wreed is teenoor dié rondom hom wat wel lewendig is. Wat 'n skande as 'n Christen teen genadedood veg, maar nie sorg vir die bejaardes wat God in sy eie familie geplaas het nie. Is die inspirasie agter ons entoesiasme Christus Self, of net 'n goeie saak?

2. Navolgers van dodelike profesieë

Ontelbare gelowiges het reeds met entoesiasme hulle werk bedank, oseane deurkruis, en alles laat vaar in gehoorsaamheid aan die "profetiese woord" wat iemand by 'n byeenkoms oor hulle uitgespreek het. Die swak Christen plaas sy vertroue volkome in iemand se woorde (wat hulle dikwels oor baie ander ook uitspreek), en verwag dan dat God hom sal seën vir sy gehoorsaamheid. Jare later, as die arme gelowige uiteindelik besef dat die profesie nie van die Here af was nie, kom hy miskien tot besinning. Hy besef dan, wanneer hy die Here toelaat om hom met Sy ware lig te verlig, dat hy sy tyd verkwis het en op 'n dwaalspoor was. Die skade aan sy loopbaan, familie en reputasie kan geweldig wees.

3. Deskundiges op foute

Daar is 'n fyn lyn tussen Bybelse kritiek op hedendaagse foute, en om 'n bediening te hê wat gegrond is op persoonlike kritiek teen andere. Daar is so baie dinge verkeerd met ander bedienings en talle foute by ander predikers van die Evangelie, maar om 'n deskundige in kritiek te word, kan baie verkwiste jare tot gevolg hê. Sommige mag hele bedieninge daarop bou om ander bedieninge te beveg; hoewel baie in 'n meer private tipe professionele kritiek verval. Miskien begin dit as 'n grief of ‘n wrok. Daar is diegene wat begin met ware lig oor die foute van ander. Wat ookal die oorsprong, die resultaat is dat hulle almal onbekwaam raak om enigiets vir die Koninkryk te doen, en hulle verval tot suur skeptici. Daar is baie raak gesê dat daar geen monument vir kritici opgerig is nie.

4. Dwalinge oor eindtye

Slegs die ewigheid sal openbaar hoeveel gelowiges in hierdie slagyster getrap het. Omdat eskatologie (die studie van die dinge van die eindtyd) so aantreklik is en omdat stellings in Daniël en Openbaring (behalwe ander gunsteling profetiese gedeeltes) so 'n versoeking is om te interpreteer, was dit al 'n valstrik vir menige kosbare Christene om aanspraak te maak op spesiale insig in die ware interpretasie. Dit moes ‘n sekere entoesiastiese bediening geweldige bedrae geld gekos het om 'n advertensie in toonaangewende Suid-Afrikaanse koerante te plaas, wat 27 Julie 2002 as die dag van die wederkoms van Christus verklaar het. Die dag het gekom en gegaan, en die enigste wat in ekstase was van vreugde, was die koerante wat twee vlieë met een klap geslaan het: Hulle het duisende verdien met die halfbladsy-advertensie, en het, sonder die gewone anti-Christelike kommentaar, die dwaasheid van fanatikuste openbaar gemaak.

'n Groeiende tipe profetiese dwaling van die waarheid, is ‘n ekstreme betrokkenheid by Israel. Groot getalle Christene gaan verder as wat die Skrif beveel, en bring hulle lewens vir Israel deur. Reëlings vir Jode om terug te keer Israel toe, of om deel te hê aan spesiale vierings (wat oorbodig is omdat ons nie langer die skaduwee het nie, maar die werklikheid deur Christus), is party van die maniere om jou lewe te vermors en die geleentheid om by te dra tot die opbou van die ware Koninkryk van God, te verloor. Ja, ons moet Israel seën en bid vir die bekering van die Jode, maar 'n obsessie oor Israel kan ontaard in 'n geloof dat daar twee weë van verlossing is, en dat die uitverkore volk 'n "tweede kans" kry.

5. Gevoelsfladderers

'n Groot deel van die Christendom volg altyd die nuutste neigings. Dit maak nie saak hoe hard die nuutse gier uiteindelik inmekaarstort nie - hulle is altyd gereed vir die volgende een. Elke nuwe golf, wat aan die Heilige Gees toegeskryf word, moet meer sensasioneel wees as die vorige een. Hulle het 'n onversadigbare sensasielus. Of dit die groei van bene is, of ‘n agteroorvallery, ‘n gegiggel of goudstof - hulle aptyt vir méér word nooit versadig nie. Hulle fladder rond in 'n wêreld van gevoels-Christendom en word al meer ongevoelig vir die Here se gevoelens en gebooie.

6. Intellektuele magteloosheid

Net so gevaarlik as die kategorie hierbo, is diegene wat op die rampspoedige ompad van algehele geloof in hulle eie verstand wegdryf. Hulle afdwaling is so geleidelik dat hulle nie in staat is om te besef dat hulle die pad verlaat het nie. Miskien het Paulus sommige van hulle in gedagte gehad toe hy gepraat het van dié wat "altyd iets wil leer maar tog nooit tot die kennis van die waarheid kan kom nie" (2 Tim. 3:7). Hulle beroem hulleself op die vermoë om te kan dink en redeneer, maar in werklikheid het hulle magteloos geword omdat hulle geloof in hulleself is en nie in die Here Jesus nie. Dit is rampspoedig vir die kerk as hierdie geestelike ontmandes leiers in hulle denominasies is.

"Wees dus op julle hoede dat julle nie meegesleep word deur die dwaling van beginsellose mense en so van julle eie standvastigheid beroof word nie. Sorg daarenteen dat julle steeds toeneem in die genade en kennis van ons Here en Verlosser, Jesus Christus" (2 Pet. 3:17&18).

1 Kor. 15:58: "Wees standvastig, onwankelbaar, altyd oorvloedig in die werk van die Here, omdat julle weet dat julle inspanning in diens van die Here nie tevergeefs is nie".

BELANGRIKE DATUMS:

* 5 - 7 September 2003 - CFT Algemene Jaarvergadering: Vir meer besonderhede kontak (032) 481-5512.

* 7 - 14 Desember 2002 - Kwasizabantu Jeugkonferensie: Onthou asb. beddegoed en eetgerei. Vir meer besonderhede kontak (032) 481-5500.

* 3 - 6 Maart 2003 - Kwasizabantu Predikantekonferensie Vir meer besonderhede kontak (032) 481-5500.