Indeks:

WARE VERDRAAGSAAMHEID

Kjell Olsen het hierdie artikel op die Internasionale Dag van Verdraagsaamheid op 9 November 2001 voorgelê.

Vandag is dit die Internasionale Dag van Verdraagsaamheid. Net verlede week het ek by Ground Zero in New York gestaan, die mees skokkende voorbeeld van onverdraagsaamheid hierdie eeu. As jy oor die puinhope van die hoogste torings ooit ter wêreld heenkyk, die galsterige, suur reuk van rook en stof steeds hangende in die lug, en wetend dat 5000 mense nog in hierdie puinhope lê, dan word die betekenis van onverdraagsaamheid opvallend duidelik. Hierdie daad is gepleeg deur diegene wat die woord 'vryheid' haat, en die land verag, met seker die vryste politieke sisteem in die wêreld.

Terwyl die onverdraagsaamheid van vryheid die onderliggende oorsaak van hierdie terreurdaad is, is dit ook waar dat die reaksie hierop onverdraagsaamheid teenoor sulke gedrag moes wees. Amerika moes terugslaan. Om die daad waarin duisende op 11 September gedood is te verdra, sou eenvoudig meer vryheid vir terrorisme tot gevolg gehad het. Eenvoudig gestel, onverdraagsaamheid moes afreken met onverdraagsaamheid. Die vraag is: wie se onverdraagsaamheid is reg? En die logiese vraag wat hieruit spruit, is wie se definisie van reg en verkeerd verdra kan word.

Sonder enige maatstaf van goed en sleg, reg en verkeerd, bevind die mensdom hom noodwendig in 'n penarie rondom die hele onverdraagsaamheidskwessie.

Die Bybel, die Woord van God, is die standaard wat die toets van die tyd deurstaan het. Daarin vind ons God se vaste standaarde en maatstawwe van goed en sleg. Hierdie onaangeleerde wet van reg en verkeerd is in die natuur van elke mensehart ingegraveer.

Net gister, stap ek verby die huis van 'n man wat kort tevore vir die tweede keer geskei is, en toe verklaar het dat hy tot die Indiese Shaman geloof behoort. Hy het vir homself 'n volledige tipi met 'n kring van klippe gebou om sogenaamde heilige vuur daar te brand. Die tipi, gemaak van ou, vuil komberse is 'n seer oog langs sy groot huis. Dit het my herinner aan die Bybel se maatstaf vir ons eie pogings om godsdienstig te wees, waar daar staan: "ons geregtighede (is) soos 'n besoedelde kleed" (Jes 64:6).

Wanneer ons ookal ons eie standaarde opstel, lei dit altyd tot onverdraagsaamheid teenoor die lewende God en Sy weë.

Laat my so 'n bietjie voortborduur op hierdie waarheid met behulp van 'n voorbeeld uit kinderopvoeding:

Het jy al ooit ouers dopgehou wat met hulle klein kindjie speel? Hulle is altyd op hulle hoede ingeval daar iets is wat die kind se gesondheid of veiligheid bedreig.

"Moenie in die straat hardloop nie!" "Oppas, die stoof is warm!" "Dwelms kan jou doodmaak."

Ma's en pa's wat hulle tienerkinders liefhet, waarsku hulle nog: "Wag tot jy getroud is."

Al hierdie soorte stellings het te doen met gedrag, en wanneer dié gedragsvorme misbruik word, kan dit siekte, besering en selfs die dood veroorsaak. Ma' en pa's is baie onverdraagsaam wanneer dit by vernietigende gedragspatrone kom, want hulle is lief vir hulle kinders.

In die beskaafde gemeenskap bestaan daar 'n behoefte aan onverdraagsaamheid teenoor sekere gedragsvorme: die vernietigende en negatiewe. 'n Samelewing wat sulke verwoestende gedragspatrone duld, is niks beter daaraan toe as ouers wat goedsmoeds staan en toekyk hoe hulle kind deur 'n motor omgery word nie.

Hoe kan 'n mens vernietigende gedrag onderskei?

Nog 'n gesegde kom by my op. "Aan sy vrugte sal jy hom ken." Die VIGS-pandemie byvoorbeeld, is 'n duidelike aanwyser dat sekere gedragspatrone ontmoedig moet word; dat die menslike samelewing onverdraagsaam behoort te word teenoor die lewenstyl wat sulke gedrag aanmoedig.

Verdraagsaamheid teenoor seksuele onsedelikheid, en die absurde mening dat ons gemeenskap perversie moet verdra as net maar 'n ander vorm van seksuele uiting, het tot gevolg dat miljoene jonk sterf. Dit is nie 'n deug nie. Dit is 'n doodsvonnis.

Liefde, vergifnis en meegevoel is deugde. Om iemand lief te hê wat deur 'n vragmotor getref gaan word, beteken om hom uit die pad te pluk, nie om hom aan te moedig om na die vragmotor te hardloop nie.

So is dit nodig vir ons om onverdraagsaam teenoor vernietigende gedragspatrone te wees. Ware liefde vereis niks minder nie. God het sekere standaarde in Sy Woord gestel. Dit is nie onderdrukkende wette nie, maar soos Jakobus dit stel: "die wet van vryheid".

Wanneer ons wette opstel wat in skrille kontras met God se geopenbaarde wil staan, sal dit noodwendig rampspoedige gevolge hê. Die samelewing mag wel spog oor sy verdraagsaamheid teenoor pornografie, aborsie en homoseksualisme, maar eintlik gee dit net uitdrukking aan sy onverdraagsaamheid en haat teen God. Hierdie lewende God het in Sy Woord verklaar dat daar nie met Hom gespot mag word nie, want "wat jy saai sal jy maai". Verkragting, bloedskande, die miskenning van der duisende lewens, en die verwoesting van gesinsbeskerming, is maar enkele van die gevolge wat die mensdom alreeds oes.

Ware verdraagsaamheid moet altyd begin met 'n liefde vir God en Sy Woord. Die Tien Gebooie, bv. is gegee om ons te beskerm. Onverdraagsaamheid teenoor moord skenk aan ander die reg om te lewe; onverdraagsaamheid teenoor egbreuk beskerm egpare en hulle kinders; onverdraagsaamheid teenoor diefstal gee die reg om te mag besit.

Kom ons keer terug na God se wet van vryheid, en sodoende sal ons ware verdraagsaamheid teenoor alles wat wonderlik en goed is, verseker.

‘ONSKENDBARE LEWE’-SONDAG

'Onskendbare Lewe'-Sondag word jaarliks op die Sondag naaste aan 1 Februarie herdenk - die datum toe aborsie op aanvraag in Suid-Afrika in 1997 gewettig is. Hierdie jaar word dit vir 3 Februarie beplan.

Op hierdie dag word kerke aangemoedig om onderrig te gee oor aborsie en te bid dat dit beëindig sal word. Bewusmakingsartikels en radioprogramme behoort deel uit te maak van die Christen se media opleidingsveldtog. Met die prediking teen aborsie, is die doel nie om mense te oortuig dat aborsie 'n sonde is nie, selfs die aborteur herken dit alreeds. Mense moet oortuig word dat dit "onverdraagbaar" is, daarom is Christene moreel verplig om aksie te neem om dit stop te sit. Dit kan hulle deur protes aan te teken, politiese stemwerwery, voorsiening van alternatiewe uitkomste of ondersteunende bydraes vir die saak.

DAGBOEK VAN "LOERBROER" HUISGENOTE

Beroemdheid in 'n kits, kamers in die Emperor hotel by Caesars, en vergoeding vir 'n optrede van tussen R3000 en R5000 per uur. Dit is wat die "Loerbroer"-huisgenote te beurt val ná hulle uitsetting uit die "Loerbroer"-huis in Randburg. Afgesien van hulle beroemdheidstatus, tree die huisgenote almal as eregaste op, word hulle kommentare oor die radio gevra, en word hulle in advertensies gebruik.

Nie al die huisgenote word egter in dié wolk van beroemdheid gehul nie. Jeanine, 'n onderwyseres van die Wes-Kaap, het in 'n storm van omstredenheid by die huis uitgestap, en die publiek het nie veel van haar gedink nie. Haar optrede in die huis het 'n geweldige reaksie teen haar uitgelok, en 'n haat-aanklag, wat later teruggetrek is, is teen haar aanhangig gemaak, en van haar gedrag het skerp kritiek uitgelok. Daar is ook 'n moontlikheid dat sy haar werk as onderwyseres kan verloor.

"Loerbroer" is 'n afloer vertoning wat die afloersindroom van die kykers bevredig. Die deelnemers het hulle op die mees onsedelike en liederlike maniere gedra. Die vervaardigers van die stuk, sowel as die deelnemers en die kykers, het egter die heel belangrikste aspek van die saak vergeet. Dit is naamlik dat God die enigste Een wat geregtig is daarop om "af te loer" wat ons doen, alles sien en hoor wat deur hulle gedoen word. Dit geld vir die deelnemers aan "Loerbroer". Hy is die enigste Een wat ons aanspreeklik sal hou vir die manier waarop ons ons lewens hier op aarde deurgebring het. As Christene wat staan vir die waarheid, behoort ons nie onsself te verontreinig deur na sulke perverte programme soos "Loerbroer" en "Love Cruise" te kyk nie.

Wat is "Love Cruise"?

In Fox se nuwe een uur reeks "Love Cruise", gaan sestien ongetroude mans en dames tussen die ouderdomme van 22 en 35 jaar, op die oop see vaar in 'n soeke na romanse en verhoudings. Kameras sal elke oomblik van die reis vaslê wanneer hierdie mense deur die Suid-Karibiese see van Grenada tot by Aruba vaar. Aan die begin van elke episode, (elke 3 dae), sal die ongetroudes afpaar om 'n kajuit te deel, en om in 'n reeks van daaglikse fisiese- en verhoudingspeletjies te kompeteer. Aan die einde van elke episode sal die mans dan stem oor watter dame die skip moet verlaat, en die dames oor die mans. Die paartjie wat wen, ontvang 'n kontantprys en 'n reis om die wêreld. Hierdie vertoning sal van die begin Januarie af gebeeldsend word, en word beskou as erger as "Loerbroer".

Wat hierdie vertoning skilder, is niks anders as suiwer pornografie nie. Dit is nie "love cruise" of "liefdesreis" nie, maar 'n "lust cruise" of "wellusvaart", want dit is wat hier die botoon voer. Die begeertes van die vlees, begeerlikheid van die oog en die trots van die lewe. As Christene hierdie vertonings kyk, is hulle meer skuldig voor God as die heiden wat daaraan deelneem.

VIGS IN SUID-AFRIKA

Binne verloop van vyf jaar, sal een Suid-Afrikaner per minuut aan 'n Vigs-verwante siekte sterf, tensy aksie nou geneem word. Teen 2005 sal daar ses miljoen mense met Vigs besmet wees, en daar sal meer as 1600 sterftes per dag in Suid-Afrika wees. Hierdie land het die snelste groeiende epidemie van enige land in die wêreld. Een uit elke vyf volwassenes is alreeds geinfekteer en die infeksiekoers styg met 2000 per dag.

Vigs is die enkel mees belangrikste strategiese kwessie wat tans die Suid-Afrikaanse besighede konfronteer, volgens Stephen Kramer, hoof van die Vigs Navorsingseenheid by Metropolitan. Die direkte kostes met betrekking tot MIV/Vigs, in die vorm van verhoogde bydraes vir mediesefonds, groep lewens- en ongeskiktheidsdekking, kan verdubbel teen 2005 en verdriedubbel teen 2010. 50% van die beddens in die grootste provinsiale hospitale is reeds deur mense met Vigs in beslag geneem, en wat nog voorlê is tien keer erger. 'n Vloedgolf van Vigsgevalle gaan nog in Suid-Afrika gesien word, en die gesondheidsstelsel sal hard getref word. In Suid-Afrika, sal die bruto binnelandse produksie na verwagting 17% laer vir 2010 wees as wat dit sou wees sonder Vigs.

Vigs in Afrika

Volgens beramings deur 'UNAIDS', het 34,3 miljoen mense in die wêreld Vigs. Van al die mense wat met MIV saamleef, woon 90% in sub-Sahara Afrika, Suid-Oos Asië of Latyns-Amerika. Nagenoeg 19 miljoen het gesterf aan Vigs, 3.8miljoen van hierdie sterfgevalle was kinders onder die ouderdom van 15 jaar. Daar was 5.4 miljoen nuwe Vigsbesmettings in 1999, 4 miljoen daarvan in Afrika. 13.2 Miljoen kinders is wees agtergelaat deur Vigs, 12.1 miljoen van hierdie kinders in sub-Sahara Afrika.

Die totale getal Afrika-mense wat met MIV of Vigs saamleef is tans 25.3 miljoen. In 8 Afrika-lande, is ten minste 15% van die volwassenes besmet. Afrika is die tuiste van 70% volwassenes en 80% kinders wêreldwyd wat met Vigs saamleef, en het driekwart van die meer as 20 miljoen mense wat wêreldwyd aan Vigs gesterf het, begrawe, sedert die epidemie begin het. In 1997 was dit geskat dat publieke gesondheidsuitgawes vir Vigs alleen reeds 2% van die bruto binnelandse produksie oorskrei het in 7 van 16 Afrika-lande.

Meer as een kwart volwassenes van werkers-ouderdom is besmet met MIV in sommige sub-Sahara gemeenskappe. Geldelike bronne word uitgeput wanneer families 'n familielid moet versorg wat siek is met Vigs. Hierdie bronne sou vir ander benodighede en die kinders se toekoms benut kon word. Die mense wat agtergelaat word is weeskinders, en die ouer mense wat die las moet dra om vir ander familielede te sorg, moet uit 'n bron van verminderende opgeleide en talentvolle werkers put.

Die Amerikaanse Sensus Buro voorsien dat Vigs sterfgevalle en die verlies van toekomstige populasie deur die dood van vroue van vrugbare leeftyd, sal beteken dat teen 2010 sub-Sahara Afrika 71 miljoen mense minder sal hê as wat daar andersins sou gewees het.

DIE NUWE KURRIKULUM - HOE RAAK DIT JOU?

Gedurende die laaste paar maande vind ons 'n geweldige polemiek rondom die omstrede leerplan wat deur die Departement van Onderwys voorgelê is. Christene vir die Waarheid se amptelike reaksie hierop lui soos volg:

"Namens die 104 000 lede van Christene vir die Waarheid wil ons graag ons bekommernis uitspreek oor die Minister van Onderwys se voorgestelde Nuwe Kurrikulum Riglyne. Die dokument beslaan 1400 bladsye en as gevolg hiervan maak dit opmerkings in fyn besonderhede baie moeilik. Ons pleidooi is dus beperk tot slegs 7 punte:

1. Is dit werklik nodig vir 'n nuwe kurrikulum? Onderwysers en kinders sukkel reeds om by te bly met die huidige leerplan. Nuwe veranderinge en veral dié van radikale aard vervat in die voorgestelde dokument, sal waarskynlik die huidige vlak van verwarring laat toeneem. Laat onderwysers toe om die werk waarvoor hulle opgelei is, te doen. Laat hulle die basiese beginsels van onderwys aan kinders wat in 'n desperate situasie 'n nood het vir stabiliteit en 'n deeglike akademiese basis, oordra. Hierdie nuwe leerplan sal beslis verwarde onderwysers meebring wat gevolglik verwarde kinders sal veroorsaak.

2. Die algemene indruk van die dokument is dat dit eeder politieke lewensbeskouing as suiwer onderwys weerspieël. Dit wil voorkom asof die skrywers van die dokument 'n basiese waarde sisteem aanhang, wat bestaan uit die nuttelose ideale van "Transformational Outcomes". Dit voorspel niks goeds as die voorgestelde leerplan vurig aandring op nuwe waardes nie. Die waardes word op kinders afgedwing wat in elk geval aan ouers en nie aan die staat behoort nie. Dit sluit aspekte soos waardering vir alle godsdienste, 'n "breë" omskrywing van die begrip gesin, evuolusie van die mens, aborsie en vele ander waardes in.

3. Dit wil voorkom asof sekere ontsaglike leemtes doelbewus nie aangespreek word nie en dit ten spyte van die oënskynlike beheptheid met fyn besonderhede in die dokument. Byvoorbeeld, die verspreiding van Islam in Afrika word ingesluit terwyl die geskiedenis van Christen sendelinge in Afrika glad nie aangespreek word nie. Slawerny word eensydig in die lig van die Westerse vorm daarvan beskryf maar dit ignoreer Islamietiese slawerny in Afrika. Wil die Departement van Onderwys werklik slegs sekere dele van die geskiedenis aan die volgende geslag oordra?

4. Na bestudering van die "Lewensoriëntering" en "Sosiale Wetenskap" leer-areas, is ons geskok om te sien dat geen melding van kuisheidsopvoeding gemaak word nie. Dit blyk asof daar in teendeel 'n besondere klem op seks-opvoeding geplaas word. Dit is egter nie vanuit 'n gesins-vriendelike oogpunt soos wat deur die oorgrote meerderheid Suid Afrikaanse gesinne aangehang word nie. Die Departement van Onderwys is bekend vir sy geskiedenis van goeie samewerking met die "Planned Parenthood " organisasie. Ons is daarom in die besonder besorgd dat hulle nou daardie soort van radikale seksuele opvoeding mag kies. Hierdie losbandige opvoeding van PPSA word ongetwyfeld geheel en al verwerp, deur gesinne wat suiwer waardes aan hulle kinders wil oordra.

5. Dit is verontrustend dat daar voortdurend melding gemaak word van neutraliteit, terwyl die staatswaardes in feitlik elke paragraaf baie sterk na vore kom. Dit is egter 'n illusie en in sigself 'n onware standpunt oor die realiteit. Fundamenteel is dit godsdienstig en dus in skril teenstelling met die sogenaamde neutraliteit van die dokument.

6. Die nuwe leerplan beoog om 'n nuwe waarde, naamlik simpatie vir homoseksualitiet, te vestig. Dit is verregaande dat "seksuele oriëntasie" aan ons kinders geleer moet word, asof dit gelykstaande aan "ras, geslag, ouderdom, gestremdheid, kultuur en godsdiens", is. Op die koop toe sal ons kinders, ten einde te vorder na die volgende graad, beoordeel word aan die hand van "hulle aktiewe toewyding aan konstitusionele regte en sosiale verantwoordelikhede met 'n besondere sensitiwiteit vir uiteenlopende kultuur en lewensbeskouinge".

7. Daar is 'n ooglopende poging om die begrip "gesin" te her-definieer. Onder die voorwendsel van die integrasie van menseregte word kinders, in graad R, aangemoedig om 'n "breë begrip van die gesin" aan te leer. Ons wil hiermee veronderstel dat dit homoseksuele en lesbiese huwelike sal insluit.

Ons stel voor dat, die Nuwe Kurrikulum Riglyne, in sy geheel verwerp word. Om werklik vooruitstrewend te wees, behoort die Departement van Onderwys eerder by beproefde leerinhoud en tegnieke te bly. Ongelukkig is lewensbeskouing en politieke oorwegings soms belangriker as werklike opvoeding en sal hierdie Nuwe Kurrikulum Riglyne waarskynlik geïmplementeer word. Die meeste onderwysers vind die beginsels van Uitkoms-gerigte Opvoeding geweldig verwarrend. Hulle sal waarskynlik eerder geneig wees tot 'n skikking, waar beproefde tegnieke en inhoudsvakke, geklee in die nuwe terminologie van die Departement, aangebied word. Ouers sal in die besonder waaksaam moet wees oor die inhoud van hulle kinders se boeke. Laat die Staat nooit vergeet dat dit steeds ouers is wat deur God bestem is om hulle kinders te onderrig nie."

Eerw. K. Meshoe (LP) het gesê: "Christen ouers moenie dat die Staat inhoud wat onderrig by die huis ondergrawe, bepaal nie." Hy het ook verder gesê: "Ouers moenie afstand van hulle Godgegewe verantwoordelikheid doen om hulle kinders op te voed nie. Die Staat moet ook ophou om seksuele aktiwiteit in skole aan te moedig"."

CFT PERSVERKLARING OOR VERKRAGTING EN PORNOGRAFIE - 14 NOVEMBER 2001

Die Suid-Afrikaanse publiek was met afgryse vervul deur die ontdekkings van kinderverkragting: 'n 9 maande-oue babatjie is deur 'n bende verkrag; 'n oupa is toegesluit omdat hy sy 4 jaar-oue kleindogter verkrag het. Mense-lewens word vernietig deur wellus.

Is daar 'n verband tussen die beskikbaarheid van pornografie en die styging in kinderverkragting? Kon mans wat pornografiese materiaal kyk, hulle begeertes bevredig deur kinders in hulle eie families en buurt as maklike en kwesbare teikens te gebruik?

Die SAPD bevestig dat waar arrestasies gemaak is ná verkragtings, die gemeenskaplike faktor gewoonlik pornografiese materiaal was. Wetgewers behoort die skade wat pornografie aan kinders berokken, te herondersoek.

Pedofiliese pornografie en 'volwasse' pornografie behoort veroordeel te word omdat enige vorm van pornografie die kyker aanwakker om dit wat hulle gesien het, te beoefen op klein mensies omdat hulle nie terug kan baklei nie en geïntimideer kan word.

Die verband tussen volwasse pornografie en kinderverkragting behoort opnuut ondersoek te word en die uitslae van hierdie navorsing gepubliseer te word, om druk op die wetgewers te plaas om die beskikbaarheid van pornografie te beperk.

Verkragting

Die SAPS Kriminele Informasiesentrum in Pretoria verklaar dat 13540 kinders jonger as 17 gedurende die jaar 2000 verkrag was van hierdie getal was 7899 onder die ouderdom van 11 jaar. Ongeveer 2400 meisies onder die ouderdom van 17 was gemolesteer 1511 van hierdie gevalle was onder 11-jarige ouderdom.

Volgens statistieke word 10 vroue per uur in Suid-Afrika verkrag. 1306 Vroue was deur die loop van 2000 gemolesteer. 1627 Seuns onder die ouderdom van 17 jaar was seksueel gemolesteer, 884 gevalle was jonger as 11 jaar en 743 gevalle tussen die ouderdom van 11 en 17 jaar. Daar was 113 gevalle van bloedskande met kinders en ongeveer 5000 gevalle van ontvoering, waarvan 1025 kinders jonger as 11 jaar was en 917 hiervan tussen die ouderdom van 11 jaar en 17 jaar was. Hierdie is slegs die gevalle wat gerapporteer was.

Waarom is hierdie verskynsels aan die toeneem?

Ons samelewing het dekadent geword en losbandigheid het algemeen geword. Alkohol en dwelms is vryelik beskikbaar. Verkragters gebruik hierdie middele om hulle misdade uit te voer.

Verkragters het dikwels 'n geskiedenis van drankmisbruik, 'n lae selfbeeld en lae frustrasie toleransie vlak. Rassisme speel 'n rol in verkragting - dit is 'n daad van aggressie teen 'n persoon van 'n ander velkleur.

Verkragting en molestasie het drasties toegeneem sedert die Wet op Films en Publikasies in 1996 aanvaar was. Dit het tot gevolg gehad dat daar 'n drastiese toename in pornografie was. Die beskikbaarheid van hierdie materiaal op televisie, in films ens. het die getal verkragtings radikaal laat toeneem.

OORDENKING: "KYK, EK MAAK ALLES NUUT" – OPENBARING 21:5

As ons ons wens kon gehad het, sou daar dalk dinge in die afgelope jaar wees wat verkieslik vergete sou bly. Dit is ook waar dat dit nou die gebruik geword het dat mense 'n lysie maak van sake wat hulle gewillig is om eenkant te laat, en nog 'n lysie van goeie voornemens wat hulle graag sou wou uitvoer in die nuwe jaar.

Tog bly ons pogings om onsself te volmaak, altyd tevergeefs.

God vertel ons van die bose mensehart en beloof dan dat Hyself die hart van klip kan wegneem, en dit vervang met die hart van vlees. Jesus het aan die geleerde Nikodemus die geheimenis van wedergeboorte verduidelik.

Paulus brei uit op die belangrikheid daarvan om na Christus te kom, sodat ons in nuwe skepsele verander kan word. "Daarom, as iemand in Christus is, is hy 'n nuwe skepsel; die ou dinge het verbygegaan, kyk, dit het alles nuut geword." (2 Kor. 5:17)

Wanneer dit alles tot 'n einde gekom het, sê God dat Hy weer, as die Skepper van alle dinge, die ou dinge verby sal laat gaan en alles nuut sal maak. (Open. 21:5)

Ja, sekerlik is daar hoop om die ou bose dinge in ons harte en lewens te vernietig en hoop te gee op 'n nuwe lewe in Christus by die kruis!

BELANGRIKE DATUMS

* KwaSizabantu Predikantekonferensie: Vir meer as ‘n dekade is hierdie konferensie op ‘n jaarlikse basis gehou. Die volgende konferensie is vir Maart 2002 beplan, maar vanweë baie ander aktiwiteite en geleenthede in die Here se werk, was dit nie moontlik om betyds die nodige reëlings vir hierdie konferensie te tref nie. Dit is besluit om die volgende een in Maart 2003 D.V. te hou. U sal op hoogte van die datum en ander reëlings gehou word, soos die tyd nader kom.